البنت من تختار عاجل جدا

فريده · 04-19-2009, 06:25 PM

الى البنات والشباب يهمني ردكم
هذي قصه حقيقيه
وحده تطلقت من رجل خليجي لها ولد منه واخذه ابوه
البنت بعد الطلاق باسبوع تقريبا تقدم لخطبتها رجلين وركزوا معاي
الاول // ولد عمها من بعيد
مواصفاته : 1- عاطل بس يعمل في مصنع مع والده اذا زعل ماعطاه ولا ريال واذا رضى عطاه اللي يمشي حاله .
2- اعرج عرجه واااااضحه .
3- شهادتها اعلى من شهادته .
4- موجود في منطقه بعيييده عن اهلها ( مع العلم انها عانت من فراق اهلها من الزوج الاول )
5- ساكن مع اهله ( نفس عيب الزوج الاول )
6- الميزه اللي فيه انه شاب.
الثاني // رجل بعيد من نفس العايله ولكن مش من نفس الفخذ .
مواصفاته :<<< شكلهم تحمسواا

1- اكبر منها ب25سنه.
2- متزوج حرمتين وعنده عيال اكبر منها ومتزوجين .
3- يعمل في ارمكوا ومرتاح ماديا
4- عنده بيت ولها شبه دور في البيت وبيته ملك فله
5- قريب جدا من اهلها ( وانتبهوا للمعاناه حقت البنت اللي فوق )
6-ماعنده مشكله تكمل دراستها ومتفتح يعني يعطيها حريه اكثر من اي شاب ( ترى البنت عاقله لاتفهمون حريه غلط )
ابوها خيرها بين الاثنين ولازم تختار او هو اللي بيختار واعطاها الين تنتهي العده
ساعدوها بارائكم ( من تختار )

فريده · 04-19-2009, 06:55 PM

شكرا ملكة الاحساس على سرعة الرد والتفاعل
لكن كنت اتمنى ردكاو مساعدتها في الاختيار ( من تختار ؟) البنت سالفتها صدق
الله ييسر وانتظر البقيه .

04-19-2009, 07:18 PM

مرحبا بك

دائما هنالك امور ونقاط مهمة جدا في اختيار الزوج او الزوجه اهم من عمله ومن شهادته ومن فلوسه

والأهم والصحيح يكون الأختيار من الزوج او الزوجه المقدم على الزواج هو يحدد قراره بنفسه

دون مشاركة غيره لأنه هم

اللي بيعيشون في مملكتهم الزوجيه الناس مو عايشه معهم

النظره الشرعيه مهمه والأهم الأستخاره واختيار من استقام في صلاته ودينه وحسنت اخلاقه

عموما دام انك ذكرتي انها لسا مطلقة نسأل الله أن يعوظهم خيرا

لاتستعجل في الأختيار وذا لزم الأمر تنتظر لما بعد العده عندما تستقر امورها بشكل كامل

حينها يكون لديها متسع من الوقت للأختيار واتخاذ القرار الصحيح

نسأل الله التوفيق

فريده · 04-19-2009, 11:44 PM

شكرا عزيزي على ردك الدوبلوماسي
بس للتذكير ابوها يبيها ترد عليه ياهي تختار او هو اللي بيختار لها
والبنت ماتدري وش تسوي
كلامك صحيح واذا جينا للصلاح فالرجل اللي اكبر منها اصلح من الشاب
والله اعلم

أبو الخل توكلنــــــــــا · 04-25-2009, 08:47 PM

مع العلم إني ضد الفكرة أصلا في الإختيار الأول ولا الثاني ..
لأن الإختيارين غلط من أساسه ..
وما في إعتقادي أنه في أب في الدنيا يجبر بنته على شي ضد مصلحتها ..
ولكن بعض المسلسلات اللي نشفوها تقول العكس ..
المهم ..

و حسب المنطق ... والمعطيات الموجودة .. أقول ...

أنا لو مجبر .. أختار العريس ( صار عريس على طول ) .. الأول .. للأسباب التالية : من وجهة نظري .. ولكم المناقشة بعد ذلك ..

1- على الأقل هو غير متزوج .. أو على حسب ما فهمت ..
2- شهادتها أعلى من شهادته .. هذه مشكلة المرأة وليست مشكلة الرجل .. هي التي تستطيع أن تثبت له أنها تحبه وليس العكس .. طالما كان عندها إرادة في إستقرار الحياة الزوجية وأصلا كانت على علم مسبق ماذا يعني طلاق مرة ثانية ..
3- من الممكن مع التوجيه الجيد والمساندة المعنوية للزوج .. أن يجد عملا غير عند والده وبالتالي يستطيع شراء منزل مستقل يستطيع السكن فيه هو وزوجته .. أو حتى على الأقل ممكن أن تسانده حتى لا يزعج والده وبالتالي يصير الشغل أحسن والمردود أحسن .. يعني مافي أب في الدنيا كلها .. ما يحب الخير لولده مهما كان .. بالتفاني في العمل والطاعة للوالد وحسن المعاملة كل شي يصير ممكن ...

اقتباس:

4- - اعرج عرجه واااااضحه .

يعني أنا نفسي ما أضمن قبل لا أرجع البيت اليوم أسوي حادث أصير معروج أكثر منه .. وهذا بصراحة مو عيب .. يعني حتى هذه ممكن مع بعض العلاج الفيزيائي أن تنحل المشكلة ... ممكن

اقتباس:

6- الميزه اللي فيه انه شاب.

وهذا اللي قاعد أتكلم فيه .. يعني ممكن تصير كل اللي قلنا عليه ...

ركزي على كلمة ..........

ـــــــ ممكن ـــــــ

أما بالنسبة للعريس الثاني ..

من المستحيل .. ومهما فعلنا من أمور ومحاولات .. أن ....

يصغر الفرق بينك وبينه 25 سنة .. يعني مستحيل ثاني يوم أو مع مرور الأيام .. أن يصبح الفرق 24 سنة .. مستحيل ..

مستحيل أن تصبحي أنت الزوجة الأولى في قلبه ... شبه مستحيل ..

اقتباس:

2- متزوج حرمتين وعنده عيال اكبر منها ومتزوجين .

يعني بالحلال . .. كل ثلاثة أيام نصيبك من الزوج يوم .. حسب الشرع والعدالة الزوجية .. أما الأول فهو لك دائما .. كل يوم ..

بالنسبة للعيال اللي أكبر منك .. أصلا هذول يعتبرون مشكلة في حد ذاتها .. إذا إفترضنا إحتمال وجود مشاكل لان قليل قليل قليل مو مستحيل .. أن واحد أو وحدة تحب مرة أبوها الثانية .. كيف بالثالثة ..

اقتباس:

عنده بيت ولها شبه دور في البيت وبيته ملك فله

نفس المشكلة الأولى .. مثلها ويمكن ألعـن من بيت أهله ....

وظنتي بيت أهله أرحم .. يعني مرة ثانية نرجع للخيار الأول ...

اقتباس:

قريب جدا من اهلها ( وانتبهوا للمعاناه حقت البنت اللي فوق )

أختي في البحرين وأخوي في جدة وأنا مسافر برا البلد .. وعادي .. مافي شي إسمه بعد في الوقت الحالي ... مادام في تفاهم بين الزوجين .. البعد عادي وممكن ينحل .... مثل ما قلنا ..
الزوج الأول .. ممكن يتحسن الوضع ومن الممكن أن يقرب .. حتى لو ما قرب ... ممكن كل فترة تكون زيارات .. ممكن ...

اقتباس:

ماعنده مشكله تكمل دراستها ومتفتح يعني يعطيها حريه اكثر من اي شاب ( ترى البنت عاقله لاتفهمون حريه غلط

هذا الكلام ما عليه رباط ..

يعني .. ممكن اليوم وبكرا وبعده يرضى ..
أقل مشكلة بعدها .. وربي ما تطلعي من البيت إلا وإنتي طالق ..
في هذه الحالة ... إيش الحل ..
يعني هو أصلا ..
سوف يقسم اليمين أن يبقى متفتح طوال حياته .. دون تراجع .. ما ظنتي .. مستحيل

حتى الزوج الأول ممكن بالتفاهم وطيبة الخاطر بين الزوجة وزوجها .. ممكن بإبتسامة .. بكلام حلو .. بليلة رومانسية مفتونة .. تفعل المستحيل .. حتى لو هو ماهو راضي ممكن يرضى عن طيب خاطر ..

الكلمة الحلوة تتطلع الحية من وكرها .. لا تنسوها يا بنـــــــات ...

أنا نفسي أكون راجع البيت وراسي وألف سيف إني أتهاوش مع زوجتي وأضربها حتى ... يعني الكلام في بالي ..
أول ما وصلت البيت .. وبدأت بالقتال العنيف .. قالت بكل برود و براءة .. يعني إنت زعلان مني ..
ثورة البركان العجيبة إنطفأت فجأة .. وقلت لها .. لأ ... وإنتهت المشكلة ...

يعني الإختيار الأول ... ممكن يصير .. ممكن يتحسن .. ممكن يكون الوضع أحسن .. ممكن ممكن ..

الإختيار الثاني .. مستحيل أن ... شبه مستحيل ...
يعني من خلال تجربتي المريرة في الحياة ...

الإختيار الأول ...........

ــــــــــــــــــــــــــــــــــــــــــــــــــ ــــــــ

مهلا ..

ما خاب من إستشار ... وما ندم من إستخار ..

أولا وأخيراً ...

كان رسول الله صلى الله عليه وسلم يعلمنا الإستخارة كما يعلمنا الصلاة ...

اللهم إني أستخيرك بعلمك وأستقدرك بقدرتك وأستعلمك بعلمك فأنت تعلم ولا أعلم وأنت علام الغيوب
اللهم إن كان زواجي من .......... خير لي في ديني ومعاشي وعاقبة أمري عاجله وآجله
فيسره له وبارك لي فيه
وإن كنت تعلم أن زواجي من ........ شر لي في ديني ومعاشي وعاقبة أمري عاجله وآجله
فاصرفه عنه واصرفني عنه .. ثم أقدر لي الخير حيث كان ثم أرضني به ..

ــــــــــــــــــــــــــــــــــ

والله أعلم

فريده · 04-25-2009, 11:26 PM

الله عليك يابو الخل
حتى كلمة رائع ومتفان شوي فيك
انا قرات ردك اكثر من 4 مرات
وراح انسخه عشات تقراه صاحبة المشكله
وانشالله سأوافيكم بإختيارها وعلى من رجحت الكفه
مشكور من كل قلبي اخوي العزيز
ردك اثلج صدري
بارك االله فيك

أبو الخل توكلنــــــــــا · 04-26-2009, 09:46 AM

عسى الله أن يتمم على خير ..
بس أولا وأخيرا
الإستخارة الإستخارة ..

والله ينفعنا جميع ما سوينا شي ..

أي تفاصيل غير واضحة على الرحب والسعة ..

نلتقي لنرتقي

أبو الخل توكلنــــــــــا · 07-05-2009, 03:32 PM

أقول يا فريدة ما عطيتينا رأي البنت في اللي كتبته
ولا علمتينا إيش اللي صار معها ..
يعني تنزلين موضوع وتنسحبين من الإجابة ..
ولا ناقلة الموضوع نقل الله يهداك ..

في إنتظارك

فريده · 07-05-2009, 06:20 PM

والله يابو الخل اني ناويه اكتب لكم عنها وعن اخر تطورات الموضوع
ياربي هاليومين قاعده اقول بنزل موضوع بعنوان ( تذكرون اول موضوع كتبته_ البنت من تختار _ )
عالعموم البنت يالطيب قررت تاخذ الشايب اللي اكبر منها .
طبعا قريتها كل الردود وكانت في حالة صمت مع ان طبيعتها تحب تتكلم وتناقش
واخر شي تحدد زواجها هالعطله ومتحمسه بحضر بس خايفه اني ابكي قولوا ليش ؟؟
لاني حضرت زواج وحده من الجماعه تزوجت شايب وهي يتيمه وقرروا ينزفون

يوم خلصت الزفه ومشوا راجعين وشفتهم جنب بعض

فرق كبير بينهم بكيت بكي يابو الخل فضحت امي من البكي لدرجة انها طلعتنا من العرس انا واختي
قلت بعدين انا شدخلني ابكي محد بكى علشانها !!!
وعلاقتي فيها بالاسم نلتقي بس في المناسبات الكبيره بس والله من جد انقهرت ...وشكرا .

فريده · 07-05-2009, 06:22 PM

على فكره انا عارفه انك بتنقهر بس شنسوي ماباليد حيله
للعلم ... والدها مرتاح للشايب اكثر من الشاب ولما قررت تاخذ الشايب بارك لها وفرح من قلبه .